انستقرام الهبة اليديدة - مع الخيل يا شقرا ويا سمرا ويا خضرا

مؤخرا نزلت البرانامج إلي الكل هب فيه هبه الانستقرام , طبعا احنا شعب هبات كله هبه نصحني صديق عزيز انزل البرنامج من أجل المتعه أصور اي شي يعني نعيش الجو مع العالم..عاد انا بطبعي احب اجرب كل شي ليش لأ مدام التجربة مراح تضر^_^ المهم نزلته البرنامج وسويت لي فيه حساب وبلشنا نفلولو العالم اي نعطيهم فلوات عشان نبلش نتابع صور .

اهو نفس فكرة تويتر لكن الشي الوحيد المختلف ان الموضوع على صور مو على كلام..فكرته حلوه ان الكل يصور شي حلو عنده او يحب يشارك العالم صوره..بس الله يهدي ربعنا الكويتيين كله صور اكل اكل اكل اكل إلي مصور لنا غداهم وإل مصور لنا الصحن فاضي ! فاضي فاضي يا الظالم ليش مصور لنا الطبق فاضي تبي مثلا نغسله لك ولا نقول لااااا طافنا ماصور لنا الطبق وهو متروس:\ اقول ترا ماطقينا لكم خبر ولا مبتدأ..المهم فيه شغله لاحظتها إهي حلوه بس بنفس اللحظة ممله من وجهه نظري يعني إل يصورون لنا أطفال حلوه الصور بس الطفل بالصور مافيه اي شي حلو خصوصا ان اغلب الاطفال يصرونهم بوضعيه عذاب يا يبجي ودموعه اربع اربع والخشم صاير فيه فيضان وهيجان وحالته حاله وإل مصوره حاط التعليق:هههههه يا حليله يونس!!..حرام عليك البنت\الصبي تشلعت أحباله الصوتية وشكله قاعد يتعذب وانت\انتي حضرتك\ج معلقين عالصورة: يا حليله؟؟ لحقوا عالولد قبل لا يتوفى من القهرأل يا حليله أل .. هذا الله يعينه الله يصبره الله ينجيه مو الله يا حليله .. عاد ول مسافر برا يشقنا شق تصوير كل 3 ثواني مصور لنا كوب ستار بوكس وهو يشربه ياكل دونت وهو معلق بالسقف, ماسك الايباد وهو مسوي وقوف عالرأس ياااااخي درينا انت مسافر والحياة هنالك فولالي وانت سعيد الله يتمم عليك بس عاد لا تغثنا كل شوي مصور لنا نمله تمشي ولا كلنكس بشارع لهدرجة ولا هو توه قاعد من النوم بالفندق والكشه صايره على صوبين اول مرة اشوف كشه على صوبين الحاله صعبة وكاتب: بعد شوي بقز ! مالت عليك مالت في أحد يقز بلندن او بإيطاليا انت شارع الحب ووايد عليك أقول ارجع وخلني أسافر عنك لوووول..ولايعني مسوي حركة يعني مصور الفراولة بالطريج او توت وعنب معلق .. يصور صور تقهر الكويتي المقطن صار له مليون سنة ماشبر برا  الكويت ههههههه ..قلبي متروسة لوووول.

بس جد برنامج بالنهاية ممتع لا يخلوا من الصور الحلوه والعبيطة بيني وبينكم انا نفسي أصور مرات صور عبيطة أمشي مع الجميع..بس بصراحه عندي قاعده مراح أصور طبق العشاء او الريوق والغداء لأنه بنظري صور ممله مافيها اي شي..انا كمتابعة  أول ما اشوف أحد مصور طبق عيش او طبقه وهو ياكل بمطعم ما اهتم لصورة وايد بس أخذ نظرة سريعه..فا أفضل ان يتم تصوير كل شي عادي بالإضافه لصور الياهل إلي يبجي وعاليا المسكين الضحية معلش صوروهم عالأقل في شي اكشن أفضل من صور الأكل فوووود هااام هاااام  ديايه مشويه ومرق ومادري شنو.

خلاصة الحجي يا أعزائي برنامج حلو وممتع ول ينزله مووووش حيندم خالص مالص وشوكران .