الانستقرام والكويتيين..جلطة لصاحب فكرة الموقع

ان قصتة قصة هالإنستقرام للي كان يتابعني بتويتر صار لي مده اتحلطم على الانستقرام وطريقه استخدامه بين الخليجيين وبين الكويتيين خاصة .. الانستقرام سووه الله يسلمكم عشان الواحد يصور مشاهد حيه * حححححـ يعني ثعبان* المهم..يصور شي جدامه قاعد يشوفه هذا الانسان العزيز المصورجي, بطريقه جميله بسيطة مع بعض التأثيرات إلي حاطينها لكم بالانستقرام لكن إلي قاعد يصير شيئون خطيرون ,, شي بعيد كل البعد عن إلي مفروض يصير, كل البعد عن الخطة المرسومة إلي رسمتها الشركة ..اتوقع صاحب فكرة الانستقرام حاشته جلطة خفيفه بس الحمدالله عدت بسلام لما شاف السيرفر الخاص بدولة الكويت..ليش ؟ .. سألتوني ليش حاشته جلطة همممم تفضلوا الاسباب:

واحد - اغلب المستخدمين يصورن كلام وهذه بحالها  جريمة بحق الكاميرا..عندك كلام حطه في موقع حق الكلام لا ويسون لك عليه بعد ريتويت وشغل عدل عشان ينتشر كلامك بين المغردين واذا عاد حضك حده عجيب يحوشك فيفوريتز من واحد من المغردين الطيبين يحط كلامك إلي من الذهب في المفضله شعليك بعد , اسم هالمكان تويتر.. بس انت نظم شغلك وامورك بتصير  جميلتون في رائعتون.

ثنين - صورة يايبينها من الإنترنت.. ليش يعني خلصت الصور إلي ممكن تصورها زين ماكو صور.. اي شي صور ريلك كشه راسك عالأقل خدامتكم ..شفيها صورها وهي ماتدري في حاله عمل منهمكة *المنهمكة ترى تعبت عليها وايد شربت وراها 3 قلاصات ماي* عشان الوالدة تستانس لما تشوفها بالانستقرام وتعطيها لايك وتزيد معاشها ربع دينار..فا منها استفادت الخدامه ومنها احنا عطيناك لايك وانت استفدت لايكات وراعي شركة انستقرام حده متشقق من الوناسه .. بس نظام صورة ياهل اجنبي العيون خضر والشعر اصفر والتعليق اخوي الصغير فديته او ولد اخوي الحلو,, لا يا ماما مايمشي الحال ..أصلا حتا لو مشيناها التليفون احتمال تنبط جبده والاقيه شايل شحنه وطالع برا البيت ويتحلطم انا بعدين منو يشتري لي موبايل يديد ها منو.. عشان جذيه اخاف على موبايلي من الهجر.

ثلاثه - *لاحظوا إني كاتبه الارقام مو حاطتها عشان اتعبكم شوي اخليكم تقرون الرقم بدل ما تشوفونه  بس شوف * الصورة يكون مالها علاقه بالتعليق اي إلي اقصده التعليق زواره تايم ومصورين السما وحركة الحبتين او مصورين حلويات وقهوة و ورا تلاحظ  بالصورة الخدامه شايله ولد صغير قاعد يبجي اظاهر ناويه تقتله بس الأم مو فاضيه ويم الخدامه حمني قاعد يركض بس إلي تلمحه منه ريله بطرف الصوره ..وماشفنا من الزواره غير الحلو والقهوة وميري والياهل إلي شكله بموت بعد شوي وريل حمني الجلحه, وين موضوع الزواره  من الصورة هااا وين وييين, اتوقع لو مكبرين حجم الصورة المسموح فيها بالانستقرام بعد جان بلاوي زرقا طلعت ...لو عند الغرب جان صور لكم صورة سنعه ..زين البعض مايبي يطلع ويهه اوكي ماقلنا شي لا طلعون الويه بس عاد طلعوا لنا شي زين الواحد يحط عليه لايك وهو سعيد ابي احط لايك وانا طايره من الفرحه صبعي يرعص عاللايك وهو يرقص سامري يطق رقبه من الهابينيس السعاده المتسعده. 

اررررربعه - شسالفه المسابقات ؟! لقد مصختموها يا قوم

خمسه - إلي يصور نفسه لازم يعطينا نظرة الما أدريه يعني يدري انه راح يتصور, على اساس مو معطي إلي بصورة موبايله وموصيه : خذ خذ صورني صوره بس لحظة خل اطالع مناك جني مادري .. انها مكشوفتون يا احبائي , وهم ماعليه صوره صورتين ثلاث عشرة جنك ماتدري نمشيها  لكن كل الالبوم القدير ماتدري لا هنيه نوقف وقفه صف واحد عشان نفهم هوا بيحصل إيييييه ..ترا والله عادي صوروا وطالعوا بعدسة الكاميرا شفيها عدسة الكاميرا ولا عشان اسمها عدسه ما طلاعونها زين لو نسميها ستار بوكسه بطالعونها .

سته - في تعليق بخاطري هو تصوير كاميرا كانون بعدسه الموبايل يعني ليش !! .. الحين شارين كاميرا مادري بجم عشان تسدحونها على الطاولة ويمها ريد بول و علج بوسهم ومادري شنو مشط شعر هنديتكم, وبالأخير تصورونها بالكاميرا الموبايل,,إلي يسوي هالحركة يراسلني على البريد القمري والمريخي ويدز كاميرته الكانون إلي مايستحقها للعنوان التالي : انا في بيتنا إلي فيه درايش وباب وتحديدا غرفتي وأكون لكم شاكره * شاكره ولا مادونا.. فهمتوها صح ولي ما فهمها يراجعني على نفس العنوان السابق* المهم شكرا عفوا.

وكانت النقطة رقم سته الأخيره وطبعا الحجي هاااظ ينطبق على الكل والجميع يعني مو على أحد معين وينطبق على بوويز و قييرز ولد بنت كولوه سيم سيم..