هالمرة راح أتحلطم بالموضوع شوي..لأنه بصراحه موضوع معلق من سنوات, مو معقولة كل هالسنوات الحكومة مالقت حل حق هالزحمة واحنا نعتبر دولة حجمها صغير جدا جدا جدا ..يعني لو واحد يعطس كلنا نسمعه والشعب كله يقوله يرحمك الله يا لي عطست ! أجل احنا دولة ساحلية مو مستغلين كل مساحة الدولة, متيمعين على البحر بس من جون الكويت لي تحت شوي وبس هذه هي الكويت صل على النبي .. وباقي المساحة الدولة صحرااااااااااااااااااااااااء فراااغ اكيد في مساحات عسكريه ونفطية لكن يظل جزء كبير جدا من الكويت فاضي, زين ليش؟ ليش مو مستغلين هذه المساحه وموسعين على الأمة, ليش متمركزين كله في نقطة وحده ؟ ليش ماتتوسع الديرة نبني محافظة جديدة ؟ شنو المانع..ما العائق؟ لاشي.. أجل مافي عائق الحمدالله احنا دولة غنية فائض الميزانية بالملايين والبلايين, وفوق البوقات إلي تصير هم في فائض اللهم لك الحمد خير الكويت دايما عامر.
زين انتوا راح تسألون شنو دخل التوسعه وبناء محافظة جديدة مع الزحمة..سؤال وجيه شوفوا يا حلوين ..المشكلة اي صحيح زحمة سير لكن العله مو بالشارع ولا بمساحه الحارات لو يسوون 8 سايدات هم راح تظل زحمة! ليش .. لأن كل شي كل شي داخل الديرة أقصد أغلب الشغل واللود على مناطق داخليه مو معقولة وزارات وشركات ومناطق ترفيهيه ومطاعم وبحر وإدارات وكل شي داخل الديرة!! شي طبيعي راح يصير زحمة لاحظوا انتوا ليش الشارع إلي داش لديرة زحمة والشارع إلي طالع منها فاضي؟ هذا بالضبط إلي اتكلم عنه..مافي توازن مافي توزيع عدل مجرد حط وخلص شغل ماكو دراسه مافي تفكير جيد..أو بالأحرى مصالح خاصه أهم من مصالح الغير..لا ومازال البناء مستمر كل يومين عمارة شركة مطعم فندق..إلخ كل هاذيل مو راح اييون بسيارات, العمارة اليديدة مو فيها حوالي 24 طابق وكل طابق جم راح يشيل وبالنهاية راح ايي حوالي 400-600 واحد يديد يزحمون الشارع على ماهو مزحوم خلقه , زين إلى متى لما يصير الناس على بعض ..اندش الديرة زحف, انا اقول احسن حل نصفط السيارة بالبيت ونروح لشغلنا مشي او عالقاري وايد افضل رياضه وصحة للجسم..شوفوا ماشاءالله هذه الرساله إلي تبي الحكومة توصلها لنا ان نخلي السيارات ونهتم بصحتنا يا سلااام عليها تجبرنا على المشي والرياضة, لا والرساله الثانية الأكثر جمالا في حاله رحت بسيارتك و قعدت وانزرعت بالزحمة ساعتين عادي قوي علاقتك مع الشعب افتح دريشة سيارتك وتعرف على أبناء بلدك..أو صار لك مده مو مسولف مع مرتك او انتي مو مسولفه مع زوجكِ انها الفرصة السانحة عندكم ساعتين سوالفوا يمديكم فيها تهاوشتوا وتناقشتوا وتصالحتوا ورديتوا حبايب..يا سلام على الخطط الجميلة إلي تدعمها الحكومة في صالح المواطنين .
أوكي نرجع لصلب الموضوع..لو قلنا مثلا تم توزيع كل شي بالتساوي على مناطق الكويت .. مراح يصير في زحمة كل مواطن و وافد راح يتم توزيعه بشكل متساوي على مناطق الكويت لأنه مو معقولة إلي يبي يداوم ولي يبي يتمشى ولي رايح المدرسة ولي يبي يخلص معاملات وشغل ولي بروح يتعالج بالمستشفيات الخاصة ولي يبي يمشي على البحر و و و والكثير كلهم بنفس الطريق! من الطبيعي جدا صايرة زحمة ومن الطبيعي جدا ان إلي خطط راح يكون حاط في باله راح يصير هذا الدمار الإزدحامي الخانق القاتل إلي قاعد يزيد كل سنة بشكل قاتل..لدرجة ان صارت الشوارع زحمة إلى وقت متأخر من الليل, قبل كانت بس وقت الصبح عشان دوامات و وقت الطلعه من الدوامات لكن الحين تفاقمت صارت الشوارع زحمة طووول اليوم .. شي غثيث جدا.
فعشان جذيه حل أزمة الزحمة مو بجسر ولا بشارع ولا ببناء دوار حل الزحمة يبيلها حل جذري وهو وسعوا الديرة كبروها..العالم قاعد يزيدون من مواطنين او وافدين, وقفوا قبول بناء المشاريع بالمناطق الداخليه والساحليه و خل يبنون مشاريعهم بمناطق فاضيه خارج محافظة العاصمة وحولي أكثر محافظيتن زحمة, فكروا فينا شوي وكفايه مصالح.
بالنهاية إلي ابي اقوله اني احب الشوكلت وعصير الجزر والجو حلو وسبب الزحمة هو فار ميت وشكرا
No comments:
Post a Comment