رمضان ستايل (صبح - ليل)

اول شي اهنيكم بحلول شهر رمضان الكريم وكل عام وانتوا بخير .. اتوقع امس أكثر كلمة تناقلت بين الحنوج هي : وانت بخير وصحة وسلامة.. مراح اطول عليكم بمقدمات التبريكات ومن هالحجي يعني انا اللي .. المهم اعزائي القارئين ادري صار لي مدة ماكتبت شي بالمدونة بس ها ذا انا ارجع لكم بموضوع قاهرني بشهر الله الكريم .. الموضوع يا طويلين العمر والسلامة ان احنا الحين بشهر رمضان يعني شهر الخير والبركة والرحمة يعني شهر احترم نفسك يالي فال امها وطاق الدنيا بالطوفة.. شوفوا احنا نعاني من الاندماجية والازدواجية النفسية والشخصية يعني تلاقي الواحد بدوام شخص وبين ربعه شخص وبس اهله شخص وبينه وبين نفسه شخصون آخر تماما , المهم ان الأغلبية يعانون من هالازدواجية الشخصانية , هاذي عدينها وآمنا بالله .. لكن ان تصير بشهر رمضان الصبح شخص وبالليل شخص آخر لاااااع لااااع عاد هنيه عاد طالت وتشمخت وتمددت وقامت أصلا تلعب سمبوسة يا سمبوسة, شنو هالنظام .. يعني عشان ماتاكلون وصيام الواحد طبعا مافيه نشاط عشان يفر بشوارع ويتكشخ ويتزقرت أو يغازل أو البنت تتمشى وتخطف الأضواء بأزيائها المهرجانية, يعني لو نقول ان شهر رمضان شهر عبادة بس مافيه صيام راح تصيرون عادي يعني دام  السالفة مافيها صيام مراح تأثر على نظام حياتكم ولن تزجوا بعضا من الإيمانيات في يومياتكم, المصيبة ان الصبح المسجات الوتسابية كلها قال الرسول والحمدالله واستغفرالله .. من يقول " الله أكبر" أذان المغرب..وانا احطة على قناة الكويت الأولى عشان اشوف هاذيل اللي ملتمين حوالين مدفع رمضان ياخي يونسون, كل واحد يايب عائلته ويسوون هاااي حق الكاميرا نقول حق الوافدين فرصة عشان اهله بديرته يشوفونه هو ويا عائلته الكريمة توفير مصاريف مكالمة دولية, لكن المواطن الكويتي اللي راز ويهه شتبي يا حبيبي انت شتبي لا ومايسوي هاااي مع البقية يعني انا اللي ثقيل , يا ماما ثقييل وصاف لي مع العشيرة .. المهم انا وين رحت دشيت بموضوع آخر نسيت شنو موضوعي الآساسي حد يذكرني ماعرف اتذكر وانا عطشانه احد اييب لي قلاص ماي بارد عشان تنتعش ذاكرتي..لحظة انا صايمة :\ لا خلاص خلاص ردوا القلاص بس حطوه بالثلاجة عشان لا يصير حار .. المهم يا طويلين العمر,,لحظة شوي عن اذنكم..صك الباااااب تعاال صك البااااب مثل مابطلته انت وفيسك ايي عبالي يلا اقلب ويهك .. لا عادي هذا بس اخوي مثل كل مره يبطل الباب ويخليه ماعرف استرسل بالموضوع وانا جذي .. ادري بطيت جبدكم صح مووو موووو هههههه لا خلاص خلاص بكمل الموضوع .. 

من يأذن المغرب وكأن شهر رمضان خلص ترجع الامور مثل ماكنت, العالم بالمجمعات والسيارات زحمة بشوارع والأغاني عالعالي والمغازل يشتغل طبيعي مثل يوم الخميس بالليل بالأفنيوز ياسلااام والبنات مكياج أوفر جدا جدا عشان تعوض شحابه الصبح ولا حشيمة ولا حيا لحرمة شهر الله الكريم .. زين اوكي ادري ان في عالم بالمجمعات ناس تتمشى تغير جو وناس تتشرى اغراض هاذيل ماعليه الواحد يتمشى بحترامة بس يراعي شهر رمضان ,لحد يقولي حرية شخصية ومادري شنو ومن هالحجي المأخوذ خيره, انت مسلم وهذا شهر كريم تحترمة غصبن عليك عاد اذا ما حترمته, دي مسأله بينك وبين ربنا تحمل ما سيأتيك 

حاول عزيزي القارئ حتى بينك وبين نفسك حاول يكون هالشهر شهر الواحد يبلش علاقة قويه مع ربه الأخطاء والذنوب اللي سويتها من قبل هذه فرصتك عشان تطلب من الله الرحمة والمغفرة ادري ان هالحجي سامعينه وايد وشابيعن منه بعد,وبيني وبينكم حتى انا شبعت منه واللوحات خو مو مقصرة ( انه شهر رمضان - انه شهر الصدقات والخير - انه شهر المغفرة والرحمة ) ادري في كل مكان قاعد تقرون هالحجي , اهو الطريقة مالتهم ممله انا اشهد خلوا الواحد يمل من هالحجي المكرر,جنه العمل الخيري للجنان الخيرية مو لصاحب العمل الخيري, بس انا بيني وبينكم احاول كثر ما اقدر اتجاهل هذه اللوحات واحط مبادئي الخاصة و ايمانياتي اللي انا احبها واللي انا اقدر عليه يتناسب مع روتين يومي..حتى لو شويه عزيزي ماعليه  ( قليلٌ دائم خيرٌ من كثيرٌ منقطع ) سورة قصيرة بعد كل صلاة أو حتى لو سورة وحده ومع الوقت تزيد عدد السور القصيرةأو تختار سورة أطول .. وختاما الله يوفقكم ويحميكم وعطوني مقفاكم لأني تعبت وانا اكتب والسلام عليكم ورحمة الله وبركاته

.

 * شاشة سودا وكلام باللون الأبيض يطلع من اسفل الشاشة*