عائلة امريكية من مدينة يوتا ,الاب مل وطقت جبده من بنته اللي على اساس كشخه وستايل تحب تلبس ملابس غير محتشمه وغير لائقه, و في مره من المرات كانت العائلة السعيدة يبون يطلعون يتمشون هو ويا عيالة السبعة اللي هم اربع عيال وثلاث بنات وهاذي البنت هي الترتيب السادس *والله ماشاءالله عندهم كديش عيال *المهم قامت الام يوم شافت بنتها لابسه هالمفصخ وهالقصير قالت لها لبسي بطرون طويل قالت البنت :لأ مابي هاذي حريتي الشخصية وانا كيفي البس اللي ابيه *واللي قلد صوت البنت يصف يمين مع البقيه* الابو شاف هالمنظر اليومي النجره على لبس البنت فقام الابو وطلع غرفته و قص بنطرونه الجنز الى ان وصل لمرحله حرجه وقام ولبسه ونزل فيه وطبعا البنت والعائله كانوا مندهشين من المنظر وفوقه لبس تيشيرت مكتوب عليه (افضل اب على الاطلاق ) وطول طلعتهم وهو لابس هالبطرون القصير اللي يفشل طبعا الناس يخزون بهالشيبه شفيه الحمدالله والشكر لابس هالقصير سبب لعائلته الاحراج ولبنته العنيده بعد..في اليوم اللي بعده بنته صورته وهو كان لابس الجنز القصير ونشرتها على احد مواقع التواصل الاجتماعيه وخرت الاولي والتالي قالت قصتها مع ابوها, حصلت الصورة على 130 الف تعليق وانتشرت القصه في جميع ولايات امريكا,ومايبيله وكالات الاخبار العالمية تسابقت منو يلحق على نشر هالقصة قبل ,وسوو مع الاب والبنت مقابلة تلفزيونية على وكالة الانباء ديزرت نيوز قال الاب بما معناه: " انا يوم سويت هالتصرف كنت ارجوا من بنتي انها تعرف شكثر انا احبها واخاف عليها وبما ان قصتي انتشرت في العالم فأحب اقول لنساء ان لازم تعرفون ان قيمتكم ماتيي عن طريق عرض وكشف اجزاء من جسدكم" وهالقصة سوت جدل بأمريكا حول احقيه تدخل الآباء في حريه ابنائهم بلبس اللي يبونه
انا من رائي الشخصي زين ماسوى بالفعل ظاهره التفصخ وعرض اللحم عشان والله موضه او كشخه مو بالضرورة في وااايد ملابس محتشمة وساتره وفضفاضه وفي نفس اللحظة حلوه وكشخه .. السالفه تطورت وصار المرأة مجرد شيء يتعلق عليها اشياء غالية من ماركات وملابس وجناط تحولت من انسان الى علاق ملابس
الاب البطل
وهاذي البنت الجليله الحيا
فيديو لقاء لهم على سي ان ان
No comments:
Post a Comment