الكتب العربية والأجنبية مثل اللقيمات و الشوكلت بار

راح اتكلم عن الشكل والتصميم والألوان حق الكتاب مراح ادش في مضمون الكتب

أوكي .. اولا لما تشوف كتاب انجليزي على ارفف المكاتبات تحس ودك تاخذه من دون ماتعرف هو حق شنو

تصميم الكتاب من برا يجذب القارئ يخليك غصبن عليك توقف عنده وتقرا شوي منه الوان غلاف الكتاب تفتح النفس

متناسقه مترابطة عنوان الكتاب مع صور والوان الغلاف ضابطة مع بعض نوع الخط المستخدم بسيط وحلو 

بحيث مايضيع العنوان مع الصورة مع كولوه .. وطبعا هذا كله بس عالغلاف عاد لما تبطل الكتاب احس ادش عالم الأحلام ترتيب حلو خط مناسب 

لا كبير ولا صغير .. اذا كان في صورة راح يرفقونها خلال النص يحونها بطريقة مرتبة واضحة الوانها حلوه

ينقون احلى وافضل الصور .. طبعا اكيد مو اغلب الكتب الأجنبية بهالمواصفات إلي انا قلتها لكن أغلب الكتب إلي مرت علي 

تركب عليها المواصفات.

_____________________________

عاد طبعا الحين تعال لما تروح لقسم الكتب العربية ياااا سلااااام شوف العجب والعجاب عاد بس تشوف الكتاب من الغلاف تحس بنهاية العالم مادري ليش غلاف الكتاب اسود يسد النفس العنوان بخط احمر فاقع محدد بلون أخضر متوفي نسبيا, مايمنع انهم يستخدمون هالألوان لكنيستخدمونها مع بعض بطريقة وبتنسيق مناسب مو قص ولزقوأكيد مايخلون صورة ولا لون ولا حركة إلا ويحطونها بالغلاف,مهرجان ..واذا يعني كتاب ذرب حطوا لنا الغلاف اخضر على زيتي وصورة مو واضحة وعنوان الكتاب مكتوب بخط مادري شلون صاير .. من تشوفه تحس المحتوى معقد والكاتب دائما اتخيل اسمه زغلول حسنين كله قاعد على قهوة شعبيه عشان تيي له افكار الكتابه يشرب شاي اسود مكتئب بس بنفس اللحظة شايف نفسه متكبر مرته مايدري عنها بالبيت كله واعليا تشتغل ومهمله نفسها, ولما يرجع بيته 

تسوي له ملوخية بالأرانب هي اكلته المفضلة وعنده 4 بنات وبنته الصغيرة دائما .. لحظة؟! انا شقاعده اقول ههههههه

المهم ماعلينا مابي ادش بخصوصيات الكاتب زغلول ههههه

فا شكنت اقول اجل اجل..الكتب العربية عاد لما نبطل الكتاب من داخل اذا ما كان يحتوي على صور فهو مقبول نسبيا لكن اذا يحتوي على صور فهو يصبح دمار مو كل الكتب اعيد وازيد لكن 70% من الكتب العربية تعاني من هالمشكلة ان الصورة مايحطونها واضحة او اذا كانت واضحة ماتكون حلوه ومو مرتبطة بالمحتوى يعني مثلا مرة قريت كتاب والله نسيت اسمه من زمان قريته كان الكاتب يتكلم عن المزارع في مصر وحاطين لي صورة مزارع في الصين !! يا ماما مو ملاحظين الفرقيه بالعيون يعني اوكي مزارع لكن بمصر مو بالصين قدروا ان في اوادم راح تشوف هالمصيبة .. حتى بالنسبة لكتب الأطفال طالعوا كتب الأطفال الأجنبية وبعدين روحوا عالعربية راح تحسون ان حسافه لو انك وانت صغير كنت من عائلة بريطانية ههههه طافك الكثير من المتعه , قصصهم بالكتب الأجنبية متعوب عليها من حيث المحتوى والرسومات وحتى نوع الورق للأطفال مختلف يكون شوي اقوى عن الورق العادي والألوان بالغلاف ومن داخل الورق شي حلو واضحة , أصلا احيانا ودي اشتري لي كتاب للأطفال من كثر ما هي كتبهم حلوه بس امسك نفسي *انتي كبيرة خلاص كبرنا على هالسوالف خلاص يا بنت الحلال هدي موش كده , وتصير هوشة بين الطفولة المتأججه والشيخوخة المتفججه مادري شقاعده اقول بس المهم نتابع *..و مو الوان باهته نفس كتب الأطفال العربية وتحس حبر المطبعه خلص على هالنسخة وقام يعطي اللون وهو مخلص.. شغل مش حالك اي كلام يا عبدالسلام ... ويش ذيس 

عرفتوا شقصد الحين :\